പാൻ ഇന്ത്യൻ ബ്രാഞ്ചിലെ നിതിനൊപ്പം അഭിനയിച്ചു, ഹാഷിറിന്റെയും അമീനിന്റെയും റീലുകൾ കണ്ട് അത്ഭുതപ്പെട്ടിട്ടുണ്ട്

അടുത്തിടെ സോഷ്യൽ മീഡിയ റീലിലൂടെ ശ്രദ്ധ നേടിയവരാണ് പാൻ ഇന്ത്യൻ ബ്രാഞ്ച്, ഹാഷിർ ആൻഡ് ടീം, അൽ അമീൻ ആൻഡ് ഗ്യാങ് തുടങ്ങിയ കൊണ്ടെന്റ് ക്രിയേറ്റർമാർ. ഇവരുടെ റീലുകൾക്ക് എല്ലാം വലിയ സ്വീകാര്യതയാണ് ലഭിക്കാറുള്ളത്. ഇപ്പോഴിതാ ഇവരുടെ റീലുകളെക്കുറിച്ച് മനസുതുറക്കുകയാണ് ധ്യാൻ ശ്രീനിവാസൻ. പാൻ ഇന്ത്യൻ ബ്രാഞ്ചിലെ നിതിനൊപ്പം താൻ അഭിനയിച്ചെന്നും അമീൻ, ഹാഷിർ തുടങ്ങിയവരുടെ വീഡിയോകൾ കണ്ട് അത്ഭുതപെട്ടിട്ടുണ്ടെന്നും ധ്യാൻ റിപ്പോർട്ടറിനോട് പറഞ്ഞു.

'പാൻ ഇന്ത്യൻ ബ്രാഞ്ചിലെ നിതിനൊപ്പം ഞാൻ ഇപ്പോൾ അഭിനയിച്ചു. ഡിറ്റക്റ്റീവ് ഉജ്ജ്വലനിൽ അഭിനയിക്കുമ്പോൾ ആണ് അമീനെ ഞാൻ കാണുന്നതും പരിചയപ്പെടുന്നതും. ഹാഷിർ ആയിക്കോട്ടെ അമീൻ ആയിക്കോട്ടെ അവരുടെ കൊണ്ടെന്റുകൾ വളരെ രസമാണ്. ചെറിയ സിറ്റുവേഷൻ കൊടുക്കുമ്പോഴും അവർ അതിൽ നിന്ന് ഹ്യൂമർ ഉണ്ടാക്കും. അത് റിലേറ്റബിൾ കൂടി ആകുമ്പോൾ വർക്ക് ആകും. അവർക്ക് ചുറ്റും നടക്കുന്നതിനെ ശ്രദ്ധിച്ചിട്ടാണ് അവർ വീഡിയോസ് ഉണ്ടാക്കുന്നത്. യൂട്യൂബിൽ ഇവരുടെ റീലുകൾ കണ്ടിട്ടുണ്ട് എന്നല്ലാതെ നമുക്ക് ഒരു അത്ഭുതമാണ് അവർ എങ്ങനെയാണ് ഒന്നും ഇല്ലായ്മയിൽ നിന്ന് അവർ ഉണ്ടാക്കുന്ന തമാശകൾ', ധ്യാനിന്റെ വാക്കുകൾ.

ഭീഷ്മർ ആണ് ഒടുവിലായി തിയേറ്ററിൽ എത്തിയ ധ്യാൻ ചിത്രം. ധ്യാൻ ശ്രീനിവാസനും വിഷ്ണു ഉണ്ണികൃഷ്ണനും ആദ്യമായി ഒരുമിക്കുന്ന ചിത്രം കൂടിയാണ് ഭീഷ്മർ. സൂപ്പർ ഹിറ്റായ ‘കള്ളനും ഭഗവതിയും’ എന്ന ചിത്രത്തിന് ശേഷം ഈസ്റ്റ് കോസ്റ്റ് വിജയനും വിഷ്ണു ഉണ്ണികൃഷ്ണനും വീണ്ടും ഒന്നിക്കുന്ന ചിത്രം കൂടിയാണിത്. ദിവ്യ പിള്ള, അമ്മേര എന്നിവർ നായികമാരാകുന്ന ചിത്രത്തിൽ വലിയൊരു താരനിര തന്നെയുണ്ട്. ഇന്ദ്രൻസ്, ഉണ്ണി ലാലു, ഷാജു ശ്രീധർ, അഖിൽ കവലയൂർ, സെന്തിൽ കൃഷ്ണ, ജിബിൻ ഗോപിനാഥ്, വിനീത് തട്ടിൽ, സന്തോഷ് കീഴാറ്റൂർ, ബിനു തൃക്കാക്കര, മണികണ്ഠൻ ആചാരി, അബു സലിം, ജയൻ ചേർത്തല, സോഹൻ സീനുലാൽ, വിഷ്ണു ഗ്രൂവി, ശ്രീരാജ്, ഷൈനി വിജയൻ, സ്മൃതി പാണ്ഡേ തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.

ഈസ്റ്റ് കോസ്റ്റ് കമ്മ്യൂണിക്കേഷൻസിന്റെ ബാനറിൽ നിർമ്മിക്കുന്ന എട്ടാമത്തെ ചിത്രമാണിത്. അൻസാജ് ഗോപിയുടേതാണ് കഥ. രതീഷ് റാം ഛായാഗ്രഹണവും ജോൺകുട്ടി എഡിറ്റിംഗും നിർവഹിക്കുന്നു. ചിത്രത്തിന്റെ സംഗീതവും പശ്ചാത്തല സംഗീതവും നിർവ്വഹിച്ചിരിക്കുന്നത് രഞ്ജിൻ രാജും, 'പാൽനിലാ പുഞ്ചിരി' എന്ന ഗാനത്തിന് കെ. എ. ലത്തീഫും സംഗീതം നൽകിയിരിക്കുന്നു.

Content Highlights: Dhyan sreenivasan talks about hashir, al ameen and pan indian branch